भोटेकोशी बाढीः कर्णालीका एक सय ३४ को अवस्था अज्ञात

भदौ ११,
सुर्खेतः भोटेकोशीमा बुधबार आएको भीषण बाढीपछि कर्णालीका एक सय ३४ जना सम्पर्कविहीन भएका छन् । रसुवा जिल्लास्थित भोटेकोशी नदीमा आएको भीषण बाढीपछि अतुलनीय जनधनको क्षति भएको छ ।

कर्णाली प्रदेश प्रहरी कार्यालय सुर्खेतले उपलब्ध गराएको यो तथ्यांक हालसम्म आफन्त तथा परिवारका सदस्यले प्रहरी र जिल्ला प्रशासन कार्यालयमा टिपाएको प्रारम्भिक विवरण हो ।

सम्पर्कविहीन हुनेहरूमा कर्णालीका दस जिल्लाबाट सडक तथा जलविद्युत् आयोजनामा मजदुरी गर्न गएकाहरू धेरै छन् । साथै, अध्ययन, सरकारी तथा गैरसरकारी संघसंस्थामा कार्यरत कर्मचारी, सुरक्षा निकायमा कार्यरत व्यक्तिहरूको अवस्था अज्ञात रहेको प्रहरीले जनाएको छ ।

हालसम्म उपलब्ध तथ्यांकअनुसार सम्पर्कविहीन हुनेहरूमा एक सय आठ पुरुष, १७ महिला, ६ बालक र तीन बालिका छन् । सम्पर्कविहीन हुनेहरूमा सबैभन्दा धेरै सल्यानका ४९ जना छन् । जिल्ला प्रहरी कार्यालय सल्यानका अनुसार ४० पुरुष, ६ महिला, दुई बालक र एक बालिकाको अवस्था अज्ञात छ ।

सल्यानका प्रहरी प्रमुख प्रहरी नायब उपरीक्षक दीपक पातलीले रसुवा र नुवाकोट जिल्लामा सडक र जलविद्युत् आयोजनामा मजदुरी तथा अन्य कामको सिलसिलामा रहेका व्यक्ति परिवारको सम्पर्कमा नरहेको भन्दै विवरण टिपाउने काम जारी रहेकाले यो संख्या अझै बढ्न सक्ने बताए ।

परिवार तथा आफन्तले टिपाएको विवरणअनुसार सम्पर्कविहीन व्यक्तिको अवस्था बुझ्ने प्रयास जारी रहेको उनले बताए । यस्तै, सुर्खेतका ११ पुरुष र एक महिला गरी १२ जना, दैलेखका चार पुरुष र एक महिला गरी पाँच जना सम्पर्कविहीन छन् ।

जाजरकोटका तीन पुरुष, रुकुम पश्चिमका एक पुरुष, दुई महिला र एक बालक गरी चार, जुम्लाका ३१ पुरुष, हुम्लाका सात पुरुष, तीन महिला, एक बालक र एक बालिका गरी १२ जनाको अवस्था अज्ञात छ ।

यस्तै, डोल्पाका एक पुरुष र एक महिला गरी दुई, मुगुका आठ पुरुष, दुई महिला र दुई बालक गरी १२, कालीकोटका तीन पुरुष, एक महिला र एक बालक गरी पाँच जनाको अवस्था हालसम्म पनि अज्ञात रहेको कर्णाली प्रदेश प्रहरी कार्यालय सुर्खेतका प्रवक्ता एवं सूचना अधिकारी प्रहरी वरिष्ठ उपरीक्षक सन्तोषसिंह राठोरले जानकारी दिए । उनले यो संख्या अझै बढ्न सक्ने बताए ।