भोटेकोशी बाढी प्रभावितका लागि डोल्पाको काइके गाउँपालिकाले एक लाख सहयोग गर्ने

भदौ ११

डोल्पाः हिमाली जिल्ला डोल्पाको काइके गाउँपालिकाले रसुवाको गोसाइँकुण्ड गाउँपालिका–२ टिमुरेस्थित भोटेकोशी नदीमा आएको बाढीबाट प्रभावितको खोज, उद्धार तथा राहतका लागि एक लाख रुपैयाँ सहयोग गर्ने भएको छ ।

गाउँपालिकाका अध्यक्ष अंगद रानाले एक विज्ञप्ति जारी गर्दै बाढीबाट भएको जनधनको क्षतिप्रति दुःख व्यक्त गर्दै राष्ट्रिय विपद् जोखिम न्यूनीकरण तथा व्यवस्थापन प्राधिकरणमार्फत सो सहयोग उपलब्ध गराउने जनाएका हुन् ।

विपद्पछिको खोज, उद्धार तथा राहत वितरणमा सहयोग पुगोस् भन्ने उद्देश्यले गाउँपालिकाले एक लाख रुपैयाँ सहयोग गर्ने निर्णय गरेको अध्यक्ष रानाले बताए । बुधबार बिहान आएको भीषण बाढीका कारण भोटेकोशी, त्रिशूली र नारायणी नदीका तटीय क्षेत्रमा ठूलो धनजनको क्षति भएकाले थप क्षति हुनबाट जोगिन तटीय क्षेत्रका बासिन्दालाई सुरक्षित स्थानमा जान र सुरक्षित रहन पनि गाउँपालिकाले आग्रह गरेको छ।