कर्णाली सरकारले विपन्न बिरामीलाई पाँच हजार देखि २० हजारसम्म यातायात खर्च दिने

साउन २८,

सुर्खेतः कर्णाली प्रदेश सरकारले कर्णालीका विपन्न बिरामीलाई यातायात खर्च उपलब्ध गराउने भएको छ । ‘जसको कोही हुँदैन, उसका लागि सरकार छ’ भन्ने नारालाई कर्णाली प्रदेश सरकारले सार्थक बनाउनेतर्फ अग्रसर बनेको सरकारले विकट भूगोल र आर्थिक विपन्नताका कारण उपचारका लागि अस्पताल पुग्न वा उपचारपछि घर फर्कन नसक्ने नागरिकका लागि खर्च प्रदान गर्ने भएको हो ।
प्रदेशको सामाजिक विकास मन्त्रालयले अबदेखि बेवारिसे, असहाय तथा विपन्न बिरामीहरूलाई यातायात खर्च उपलब्ध गराउने घोषणा गरेको हो ।
यसका लागि सम्बन्धित वडाको सिफारिस वा उपचार गरिएको अस्पतालले बेवारिसे, असहाय, विपन्न, यातायात खर्चको अभावले अस्पताल पुग्न वा अस्पतालबाट घर जान नसक्ने बिरामी सिफारिस गरेको हुनुपर्ने सर्त छ । यस्तो सिफारिससहित मन्त्रालयमा निवेदन गरेबमोजिम भौगोलिक दुरीको आधारमा ५ हजार रुपैयाँदेखि २० हजार रुपैयाँसम्म यातायात खर्च उपलब्ध गराइने सामाजिक विकासमन्त्री घनश्याम भण्डारीले बताए ।
आर्थिक अभावले अस्पतालको यात्रा तय गर्न नसक्ने वा उपचारपछि घर फर्कने पैसा नभएर अलपत्र पर्नेहरूको पीडालाई सरकारले सम्बोधन गरेको मन्त्री भण्डारीको भनाइ छ ।

‘आर्थिक अवस्था कमजोर भएकै कारण कुनै पनि नागरिकले स्वास्थ्य सेवाबाट वञ्चित हुनु नपरोस् भन्ने हाम्रो प्रतिबद्धता हो,’ उनले भने, ‘यो सुविधाले दुर्गमका गरिब जनतालाई ठुलो सहयोग पुग्ने अपेक्षा गरिएको छ ।’

उपचारका क्रममा मृत्यु भई आर्थिक अभावमा धार्मिक संस्कार गर्न नसक्ने नागरिकका लागि शववाहन बापतको रकम पनि मन्त्रालयले व्यहोर्ने भएको छ ।