कर्णाली प्रदेश सरकारले गर्‍यो यातायात नियमावली स्वीकृत, दुई सडक राष्ट्रिय प्राथमिकतामा सिफारिस

सरकारका प्रवक्ता विनोदकुमार शाहका अनुसार मंगलबार बिहान बसेको बैठकले प्रदेशस्तरका पूर्वाधार आयोजनालाई संघीय तहमा प्राथमिकता दिलाउन सिफारिस गर्ने निर्णय गरेको हो ।

सुर्खेत : कर्णाली प्रदेश सरकारले सवारी तथा यातायात व्यवस्थासम्बन्धी नयाँ नियमावली स्वीकृत गरेको छ । मंगलबार बिहान वीरेन्द्रनगरस्थित मुख्यमन्त्री तथा मन्त्रिपरिषद्‌को कार्यालयमा बसेको मन्त्रिपरिषद्‌ बैठकले ‘कर्णाली प्रदेश सवारी तथा यातायात व्यवस्था नियमावली, २०८२’ स्वीकृत गर्ने निर्णय गरेको हो ।

बैठकले कालिकोटको महाबै गाउँपालिकाको केन्द्र जोड्ने सडकलाई प्रादेशिक प्राथमिकताको आयोजनामा समावेश गर्दै राष्ट्रिय प्राथमिकता प्राप्त आयोजनामा राख्न राष्ट्रिय योजना आयोगमा सिफारिस गर्ने निर्णय पनि गरेको छ । यस्तै, जाजरकोटको वडावन–सानाखोला सडकलाई पनि प्रादेशिक प्राथमिकता आयोजनामा राखी राष्ट्रिय प्राथमिकता प्राप्त आयोजनामा समावेश गर्न आयोगमा सिफारिस गर्ने निर्णय भएको छ ।

सरकारका प्रवक्ता विनोदकुमार शाहका अनुसार मंगलबार बिहान बसेको बैठकले प्रदेशस्तरका पूर्वाधार आयोजनालाई संघीय तहमा प्राथमिकता दिलाउन सिफारिस गर्ने निर्णय गरेको हो । सडक नियमावलीको स्वीकृतिसँगै प्रदेशमा यातायात क्षेत्रको कानुनी जटिलतासमेत अन्त्य हुने विश्वास लिइएको छ ।